A vrieme, ide!

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

Vrieme ide, vrieme kak i ljete, vrieme ide i nikak nastanoviti se neda. A tak i ljete zgineju, i kak god da na prvomu su ti mestu penezeki, ljetričice i stanje kaj ih tulike maš da več zanje ni neznaš, vse te zginule bu.

A gde su ti tuj pajdaši i e pajdaše i maš? A ak po pravice i po istine se spominali bume, unda je iste nam tak povedati pred vsemi trieba da pajdaši i pajdaštve niesu ti nigdar na prvomu mestu bili, jer navek su ti same se penezeki kak najmilejši del življenjiča pred očmi kazali, tak da od nje niti nič druge niesi videti mogel. Penezi su, kak je jeden velik talijanski spremišljavec cerkveni povedal – od mrčnjaka i vraga najvekši i najsmrdlivejši drekec.

Kak i kaj ti vse une kaj h življenju prešel si kak nauk triebale je biti – e te zaistinu tab bile je i bu, kak po pravice te triebale bi. Nie ljepe nekaj iti povedat, a da z vsega toga ne ostane ti nič kaj bi bile praf nasajene.

I pak te h glave počele vse te skup gnjesti, same čem si male bliž došel unem kaj naopačni su je. Čem si ih videl mam ti nie dobre bile. Još ti je gorše bile ak si si ž njimi za stolem triebal sedeti, ili ak si ih same male triebal poslušati, kak ti povedaju da je črne bele ili da je bele črne. I čem bi se same male i zmislil nate da se bi z temi naopačnjaki triebal zestati – tebe nie bile dobre. Te nie bile od denes, tak da več ti nie bile moči za zdržati, i vse te je te štele čist fundati. Unda si sam sebe h špigljeku pogledal – i pital si sam sebe, une kaj več dugi cajt si pitati triebal – a kaj te tebe trieba, kaj ti maš od toga da sam sebe hbijaš pre dugi tie cajt.

E si kaj od teh pajdašeh dobroga dobil, osim toga kaj su te za falu hmoriti šteli, a vse si im pomogel i na noge ih postavil? E si se od teh pajdašeh čega dobroga žil, i e te doj med njimi došel pogledati gda ti nie dobre bile? Kaj si ti unda h vsemu tomu triebal i mogel, nek se hmeknuti. Bil si im dober same dok se trieba z tomu špinčiti, da bi im kak puranjske pere h vis stal, a gda je triebale prema tebe kak človek biti, unda več veljal niesi.

Najgorše je te, kaj je pri nas pune toga krive nasajene, kaj se ne stoji za človeka, kaj se z ljudmi pomeče, a vse same zate da bi se čem več zele, čem bolj hapale i čem prie nekoga htopile, same da bi putače bile čem punejše i da bi ritesnice bile čem bolj podfutrane, kak je najdebelejšomu puranu i putača. A življenje nie i nesme biti same za rit i požirak, življenje nesme biti same zate da se bi druge hkanile i zmešale, življenje bi triebale biti jednake za vse, e za une kaj su najvekši gosponi a iste tak i za najmenjšega človeka. Te kaj te nekteri ne razmeju ili drugač neznaju, te nekaj je druge, tuj im se nemre nič pomoči, kak god da bi im pomoči se največ i štele.

Iste tak trieba posluhnuti i te kaj nam Najvekši poveda, a vsaki dan te čujti i videti moreme, a poveda nam kak niesme dobri, kak triebame se obrnuti unam gde nam je jedine meste, kak triebame dobri biti. Najgorše je te, kaj Jedini je vse te povedal i unemi kaj su h Sodome i Gomore živeli, pak niesu šteli, kak i mnogi med nami - posluhnuti.

A vrieme, ide!

Prim.dr.sc. Rajko Fureš, dr.med.