Ej mislite na zutra

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

Nie življenje same popevkica i obračanje tam gde se sunčeke kaže. Vse h vsemu ti zaistinu je najgorše unda gda ti dojde, kak je te i pri nas, da več na lete zgledi nam vse te naopačne, kak najnormalnejše, kaj je pri nas zišle i vse te tak, da vsi si misliju da nič i nigdar delati nie im ni trieba. Iste tak, kak i zgledi same tak i te da se bi vse te skup štele i mele za najmilejše meti i držati, a kak se bi mogle čem bolj i več gutati i lucke se mukice žiti.

Kak da im vsem je denes, kaj poljek nam se kažeju, na pameti i ta doba h tere je veliki humanistek - Franjo Tahi živel. A un je, kaj dobre je poznate, delal kaj je štel, vsaki dnev je jemal vsemi une kaj njegve nie bile, i same je nase mislil, a vse druge je poštene i gnjel. Denes, ne same da mame same jenoga Franju Tahija, nek im mame pune, tak da je ljudmi zaistinu gorše nek je za pravoga Tahija bile. A po istine morame povedati i te da te nove gospone več se nemre namagati, kak su se hitili na te da vsakoga maloga človeka zagnjeteju. Žalosne je, kaj tie i takev Tahi, denes za praf za praf uzor je mnogami.

Denes najlepše je tem „pajdašem“, kaj su se navadili da same huse mečeju, da penezeke drugem jemljeju, da same zase glediju, da se same zase skrbiju, da za drugoga nigdar ne pitaju, da se nigdar i za nič ne geneju od ognjeka. A zaistinu su im najmilejše postale - „pipa“ i „kopanjica“ najdrajša. Za njih bi vse na svietu napravili, rojenoga oca i mater bi prodali, same da su poljek „pipe“ i „kopanjice“. I zaistinu, nie ljehke, gda te vlječe, kak i njih vlječe. Pak ni nie te ni same tak, kak god da ti drugač nekaj i češ morti spelati. Najgorše ti je te, gda prejdeš čist naopak i gda več zvlječi ti se moči ni nie. Još je gorše ti te, gda ti ne same da se nemreš zvlječi, nek se niti zvlječi ti ni nečeš. A vse te same zate, kaj ti se je vse te skup preveč smilile, tak da nie ti nič lepšega bile, nek pri „pipe“ i „kopanjice“ biti. Kak god da su te od njih tirali, ti za nikakve peneze na svietu se od njeh stirati dal niesi, za nič na svietu od njih sam nigdar ni prešel nebi.

A življenje živeti trieba za nekaj druge, a te sigurne niti jesu a niti penezi buju. Kak god da te nekteri med nami razmeti nemreju, jer penezeki su im na prvomu mestu se našli, iste tak se povedati mora, da človek se za penezeke nesme prodati, jer jemput gda se prodaš i gda zglajzaš naopak, več nigdar se ti ni zvlječi mogel neš. Kak god da štel drugač morti vse te skup i bi, povedati iste tak sam sebe a i vsemi na svietu je trieba, da nihči meste nas nemre pravoga puta poiskati. Nihči nie meste nas išel druge pajdaše hkaniti, navek sme mi bili tie kaj sme vse delali same kaj i kak bi mogli nekomu natočiti. Zate i nemreme nikoga ni kriviti zate kaj vrnule nam se je vse te kaj nam se je vrnule.

Zutra bu došle, ovak ili unak, kak god da vsi šteli bi zadržati vrieme, da navek bi nam bile tak kak nam zdaj i je, a te nam pak, nikak ni nejde, kak i nie nigdar nikomu išle. Od gda življenje na ovomu, a i vsakomu drugomu je svijetu, nihči nie bil za navek – a mnogi su te tak jake šteli. Mnogi su iskali kamena premudroga, teri bi z kamena zlatne pisanice delal, ili vodicu najslajšu tera bi življenju deteču dobu mam vrnula. A une kaj jedine je istinica prava – je te, da nihči nigdar nie našel toga kamena premudroga, kak niti tu vodicu najslajšu. Nihči se nie nigdar još najžil toga lježejšega puteca, jer življenja večitoga ma – ali same prek Gospona našega najvekšoga. A un nas pela h veseljiče najvekše, a tam se pak more dojti same prek mukice Vuzmene, nikak drugač, a tie je putec, putec kaj z bosami nogmi trieba ga je po trnjiču prejti.

Zate, ak išli si bume, same male gruntat, ak išli bume gledet gde se je zmeknula dišoba tera nas je duge mamila, unda se bume triebali ovak ili unak pitanje postaviti – a kaj vse te skup nam i trieba. I unda gda se pitame - e misliti nam trieba je na zutra, e trieba je trpljenjski živeti, nemreme drugoga odgovora na tu pitanje dati, jer odgovor na pitanje tu je same jeden. Kak god da mnogi su krajili napoprek, i kak god da mnogi napoprek i den denes čeju i ideju, same se po mukice i križeku iti more napre. Vse druge pripelati nas more h peklenjsku kmicu najgorši, gde zginule bu vsake, pak i najmenjše veselje.

Prim.dr.sc. Rajko Fureš