Gde si zdaj pajdaš najdrajši?

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

Gde si nam pajdaš, zdaj gda največ te triebame, gde si nam pajdaš, zdaj gda nam tulike fališ, gda šteli bi da si poljek nas sediš, da z nami se spominaš i da nam poveš teru lepu reč?! Gde si zdaj pajdaš najdrajši?

Dragi pajdaš, i ti nam te najbolše znaš, znaš da je najlepše i najvrednejše Horvatski govoriti i pisati. Da ma uneh kaj te im na srčeku nie, te je une kaj me najbolj žalosti, kaj razmeti nemrem, jer nie mi najjasnejše kak te moči je, te da lucke ti je drajše i slajše nek ti tvoje domače je, te nikak razmeti nie mi nikak ni moči. Kak te moči je da svoje se odhiti, da najlepšu rieč – rieč domaču se proda za nič, i da se luckoga jezika za svojega jemlje. Te morti more unie kaj štel bi drugami pokazati kak dragi su mu, ali morti same za jeden kratki cajt, ali nikak te nemre i nesme iti za duge vrieme. Vse prejde, vse se šika jeden cajtek kratki, a vse se iste tak i spretrgne, prie ili kesnejše, kak god da mi vsi skup te negdar i i nebi šteli. I kak god da nie ti ljehke, kak i vsem nam, nigdar nesmeš stati, nigdar nesmeš dojti do toga da same z glavu h poda glediš, jer trieba ti je sunčeke videti, trieba ti je zvezdice gledeti, trieba ti je pajdaše zagledati, i ž njimi biti, jer na svietu nič vrednejšega od toga ti nie, a ni bu.

I pak, ma h življenju cajteh, gda se bi zastanoviti štel, ma ih i uneh drugačkeh – gda štel bržejše bi iti, a morti i pobeči. Navek se nemreš na toga posla tak postaviti da znal buš prie – e vse se dobre bu tuj i pripetile, ili pak da vse te skup naopak zišle nam i bu. Vse je, kak i življenje - trde, ščrbljive i neda se sprevrtati, kak god da ti te mnogi put bi i štel. Tak ti dojde, da gda najgorše ti je, gda se niti neznaš z sobu praf pozdravljati, da unda gda videti bi mogel vse te skup, kaj ide i kaj nejde po pravice, da more se povedati otom same te - da nie vse prešle.

A zaistinu, i nie vse te skup prešle, jer navek nekaj ostane, navek nekaj se povrne i navek nekaj ma za dalše odnesti, kak god da navek ma uneh teri šteli bi da vse te se skup mam potepe. Kak god da negdar misliš si da več nemreš, kak god da otpiraš stare popevkice, da te bar male buju zgrele, kak god da vse ti te skup zgledi kak da več se nemre otprieti, mam te razbudil glasek bu topli i poznati, glasek pajdaški od teroga drajšega ti nie.

Mam buš veselejši čem se buš zmislil da same si male bliže pajdašem najdrajšem, mam se buš zmislil veseljiča teroga si se jedine z pajdaši žil. A pak, kak god da življenje žmehke zna biti, nie ti toga hu njem, toga kaj ti nebi mogel spelati – ak pajdaše maš.

Pajdašeh praveh nie preveč, bolj je reči da ih same par je, da same ih na prsteke jene rukice zbrojiti moreš. I te pajdaše trieba ti je dobre čuvati, zanje se trieba dobre skrbeti, da još ti bi bolši bili, kak i ti njim. Nesme si človek dozvoliti da te razmel bu unda gda več pajdašeh mu bile nebu.

Zate pajdaštve naj živi, kak une kaj najvrednejše na svietu je, naj nam cvete kak najlepše cvetje, i naj nam za navek bu med nami, dok i mi po svietu ovomu najlepšomu hodime.

Prim.dr.sc. Rajko Fureš