I te je življenje…

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

Ak i ma uneh kaj ne verjeju, kaj im je trieba iste tak za praf dati, ak i ma uneh kaj navek na vse glediju tak da h ničem istinicu pravu ne vidiju, ak i ma uneh kaj su i bi vse une kaj je triebale h srčeke deti išli hkrasti, unda je vsemi povedati trieba da vse kaj h najsvetečnejše knjige stoji, nič druge nie nek istinica najvekša, jedina.

Najgorše ti je te gda najemput une za kaj si si navek mislil da nemre nikak se dogoditi, da nigdar i nigde nemre ni biti – da te iste se tebe dogodi. Još ti je gorše te gda se češ otprieti i gda češ vse une kaj te veseli z cielem svetem podeliti, a mam čem srčeke otpreš i češ ga podeliti z vsemi bi zašel, mam te nehči hunjega hpiči, kak i gda najmenj tomu si nadal se. Bolše ti je povedati, jer te zdaj razmeš, kak najemput si pregledal, da vsi unie kaj su poljek tebe bili i kaj su te po plečamki trepali, niesu te trepali zate kaj radi te meli su, nek zate kaj od tebe nekaj šteli su i kaj triebali su te. Gda su se namestili, gda su na mehke stolčeke došli, čem su im penezeki pred očmi zabljesiknuli, mam si im več pravi nie bil, mam te je čem dalše triebale hmeknuti. A te kaj su tuj gde su je, na mehkomu, same zate kaj te ti si im spelal, kaj zanje si pred drugami klečal – kaj zase nigdar niesi niti bi, koga se te več i dotikavlje. Najvažnejše je te da si kak mulec vse im pririhtal, da vse si zanje zbavil, i zdaj – kaj z tobu nek te čist hmeknuti stran ili još bolj te fundati mam iti.

Več su se tie dragi pajdaši videli kak i na druga stolčeka mehka sediju, jer im več tie h tere su prek noči zaseli niesu bili dost mehki, mam su senjali kak buju komandu vsikud meli i kak bu „mrma“ same letela i kak se lepe buju poljek „pipe“ nacejali i z veseljem se pri pečičke najvekše i najtoplejše greli. Več su se h senjah videli kak letiju, kak komande same hičeju, kak z ljudmi krmaniju i kak vsi su na jemput im strahu, vse te „najlepše“ slikice su im pred očmi se na jemput kazale, a tie dragi „pajdaši“ su več po vsemi z batinicami lazili, a još niti su skočili nie a niti su povedali najmenj i hop. A življenje tak ti i ide, denes vsi šteli bi vse mam i prek noči, same da nie im trieba nič delati, same da nie se trieba nič im pomučiti, same zate da rit bi im se nametala i vse bi im bile unak kak su si te negde naopak zgruntali. Vse same mam, huse i zase, te su ti tie „pajdaši“. Te e bu gdo tuj krive pogledan, e buju komu zločicu napravili, e se bu kaj krive spelale, koga hkanile ili kaj druge krive otprle – te je une kaj ih se ne dotikevlje, kaj za vse une kaj triebale praf bi biti nemre nič druge povedati vsem nek da naopačne nič druge nemre ni biti – nek same naopačne.

Jene vrieme moreš nekoga i zvarati, moreš morti pred mnogami povedati te da dobri si, dragi i najlepši, a pak, kak god da povedal buš ili da se češ pred drugami kazati kak si mili i dragi, prie ili kesnejše pokazal buš da nič druge niesi nek naopačni i krive nasajeni.

Une kaj po drugami kažeš kak tati su i kak krive delaju, moreš iste tak zdaj same male dečice povedati, jer nič drugčejši niti sam niesi, a niti ti je kaj druge po glavi igdar lazile nek same „mrma“ i „pipa“. I očem se dela, same otom da se une hmekne, une na tere se z prstekem kaže, ne zate da kaj bolše bi bile – nek da se na njihovoga stolčeka čem prie i čem fletnejše hiti. I unda ak je tomu več tak, tak da same ti je do toga da ti se bi žepeki čem prie nametali, da se ljetričica bi prek noči nova zmenila, da se kljetička bi mam pridelala, da se čem več i čem bolj se bi metati huse mogle od luckoga dela, gda tak si krajiti krenul, sigurne je da daleke si zaputil se. E buš kam došel, otom se bi i bu još pune put povedale.

Mnogi pri nas prek noči su na molitvu pozabili, pozabili su na Jezušeka nam jedinoga, teri za vse nas je življenje dal - da mi življenje bi meli. I unda nekteri najrajši vse odhitiju, same da žepe bi si nametali, a pak te je tak, jer niti su ni prvi a niti najzajdnejši kaj te delali su.

A pak bu lježejše nam vsem razmeti te da su te gutiti išli vsi unie kaj največ pomogel si im, jer najbolj su penezekem veseli bili, kak novem i jedinem pravem pajdašem. A prie ili kesnejše, pak ti buju po pomoč došli. E o sramu se splati kaj i povedati, teške, jer tie pajdaši, zdej te najbolše je i videti – srama ni meli nigdar niesu. I bez brige si dok pak te kak najvekšega pajdaša po plečam trepljeju – jer da mogli su, fundali te bi bili mam.

I te je življenje…

Prim.dr.sc. Rajko Fureš, dr.med.