Jedine po poštenju!

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

Trieba je biti i trieba je človek ostati. Trieba je za navek tirati čez življenje unak kak jedine je praf. Ljehke nie, nie niti nigdar bile. Navek se je nehči morti, znal i sesti, negdar si je nehči znal i male postati pak si unda i krenuti male spremišljavati otom kaj bi se spelale. Negdar je morti nekteri med nami i pogodil, negdar morti i ne, kak te i ide h življenju. Kaj moreš – moreš, a kaj nemreš, i te dobre je poznate – te iste tak nemreš, kak god da drugač bi i štel.

Ljehke nie, nie ni zdaj, a nie niti bile nigdar. Kak god da morti nehči med nami drugač bi štel i kak god da nehči misli da more zbeči une kaj od navek mu je zaznamenjene – te je nekaj z čem se igrati neda. A pak, vse te kaj je triebale, a nie se hlovile, vse une kaj je prešle - a za čem se nie išle unda gda je te največ i triebale, vse te skup same se pozabiti more. Najgorše ti je unda gda živiš h vremenu tere je prešle, gda se same z senjami spominaš a da sam te i ne vidiš. Gda tak pre duge ti je vrieme tu kaj te drži po strani i gda se več sam sebe nemreš obrnuti praf a da si ne poveš kak ljepe ti je – unda se več tuj teške kaj popraviti da.

Žmehke je živeti, žmehke se je i obrnuti, a još je žmekšejše pobeči od senjah. Senje su nekaj najlepšejše, gdo bi štel nekaj drugoga povedati – tie bi Vam po istini povedal nekaj kaj i ne stoji. Druga je pak stvar te da senje moraš poljek sebe i husebe meti, ali da iste tak od senjah nesmeš življenje si delati. Z senjami si iste tak življenje moreš i potepsti. Senje ti triebaju biti nekaj najlepšega i najslajšega, kaj ti življenje još same moreju otprieti i pomoći mu da još bolše bi bile, a ne da ga potegneju h nadol i tebe skup ž njem htopiju.

Za življenje i vsakoga človeka trieba je i senje meti, ali iste tak mu je trieba meti i srčeke najtoplejše, kaj na svietu ga drži, kaj tira ga kak nekaj kaj tak trieba, kaj drugač niti nesme biti. Iste kak i senje, tak i srčeke je une bez čega življenja nie i bez čega življenje ni biti nemre. Kak god da se obračali i kak god da sme šteli prejti negde gde se smele prejti nie, iste tak vse te skup nam je došle do toga da, prie ili kesnejše vsaki med nami došel je do ploteca si.

Pak, kak god da štel nekteri je i med nami nekam na poprek dojti, da se nebi tak jake zmučil ili da se nebi ofnul vsigdar i vsikud kak te nie ni trieba, unda je došle te kaj jedine je i mogle. Unda se je pripetile te kaj se je pripetile, došel je jeden najmenjši pikec, niesi se praf ni obrnul, same ti se nekaj pripetile, tak da ti zgledele vse te je kak da hpićen si z nečem najoštrejšem. I poklje, gda si se od vsega štel hvugnuti, od vsega kaj te je z mrzljinu tak hude stisnule, i gda k sebe si došel, h prve vrieme ti je zgledele vse te tak kak da nič ti nie i kak da vse ti hvredu je. Za kratki cajt več dihati nie ti bile moči, prijemal si se vsikud same da do zrakeca bi došel, a nikak nie ti te moči bile.

Kak da med tem prešle su ljete, niesi se nigdar videl tuliki dugi cajt pri domu i niesi nigdar se držal tak duge uneh kaj najrajši te maju. Gda si si gruntati krenul, pred sobu si videl same une, na tere si do hčera bil pozabil, a uneh kaj do hčera su oko tebe hodili, za rukoaveka te cukali i po pleča te trepali, teh nigde bile več ti nie. Tie niti su te več zvali a niti si ih več videti mogel, kak da več, mam, nate pozabili su je.

Te morti je življenje, tak se morti mnogi med nami vladati ideju, ali te iste tak praf i nie. Tak se človek h življenju vladati nemre, človek teri človek biti i ostati če.

Prim.dr.sc. Rajko Fureš, dr.med.