Nebu nihči meste nas!

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

Hčera su Ga z palmami i drenkem dočakali, hčera su Ga zazavali, hčera im vse na svietu Je bil, hčera. A denes, denes su mam kričali – „raspni, raspni“, tak da se človek pita, od kud im se te, od cvetja, kaj su ga h rukam nosili, križ se stvoril, križ i čavljeki, kak i kladivec z terem su Ga na Golgote, kak največega tata hmorili.

Ak same male bolj pogledaš, vsaki med nami tuj sebe videti bu i bi mogel, vsaki med nami. Male je uneh kaj za druge nekaj napravili bi, kaj bi nekaj spelali po pravice i kaj same male od sebe dali bi da sviet i življenje vsem, bolši bi bili. Male je navek, a sigurne i denes takveh!

Nebu nihči meste nas! Nihči meste nas nigdar niti nie mogel, jedine kaj se po pravice povedati more, je te, da nahčeni sme bili da drugi delaju, da se h hladovine skrivame i da nič ne delame, a da nam same h požirak teče. More se vse naopačne, ovak ili onak i spelati, more te iti i dugi cajt, ali vse te skup zanavek iti pak ni nemre. Une kaj prie ili kesnejše se dogoditi mora, je te, da mora se vsaki med nami zestati sam z sobu, mora se sam iti pogledati h špigljecu – prie nek se bu z drugami spominati išel, a vse te - kak god da te negdar i nebi štel. I mora iti klečat, jer nič se bez klečanje neda zbaviti. I te je tak, drugač nie mogle ni biti, drugač niti nemre, jer tak je Najvekši te odredil, tak da življenje vsaki od nas mora za druge dati, otprieti i vse une naopačne predrieti, same da bi mogel dojti unam gde se jedine klečečki dojti more.

A pak, pokora biti mora, pokora je jedina kaj se zbeči nemre, kak god da čeme mnogi cajt h življenju prejti napoprek, tuj se napoprek prejti nemre, tuj se same more i mora po pravice. A pak, vsaki med nami trieba same po pravice iti, vsaki med nami triebal bi rieč svoju meti i vsaki med nami triebal bi rieč tu i slobodne govoriti. Najgorše je unda gda ti nedaju govoriti ili gda nesmeš povedati une kaj ti na srčeku je. Zate su, i do zdej, mnogi zgoreli, tuj i tak su se mnogi i potepli, tak da, kak god da je, vse te skup nasajene, nie niti mogle drugač ziti, nek same unak kak nie ziti triebale. A pak, najgorše je, kaj, kak god da vse te skup vsaki med nami i znati more, pak i znovič, vse se odvrti naopak. I pak je vse te skup, nasajene tak, da kak god da i češ, kak vgod da vse bi napravil da zbegel bi i da krajil bi napoprek, a pak prie ili kesnejše, na iste ti došle bu. Tak da, kak god, da duge zbegavaš, kak god da prešel bi i male napoprek, ti se moral buš prie ili kesnejše vrnuti.

I unda gda se vrnul pak buš, unda iste tak, moral buš pak klečečki iti, i unda buš morti same male razmeti mogel, kak Gosponu je žmehke bile, kak zločicu nase Je zel, za vsakoga med nami. Kak god, da nie same tak razmeti nam te ni moči, kak te moguče je, da još hčera su zazavali Ga z veseljem, kak z palmami su mahali presrečni Mu, a več denes su Ga hmorili kak da tat Je najgorši. Zdaj ti te razmeti moreš, jer ljudmi teške zameriti moreš, jer kak god da si Im dober, same dok Te triebaju, Ti te nigdar Im za zločicu jemal niesi, a ni neš.

Prim. dr sc. Rajko Fureš, dr.med.