Same praf!

Naj Blog

Vezane vijesti

Zadnji recepti

Najnoviji videi

Igre, igrice

Oglasi i najave

Mi na Facebooku

I vse ti bu te prešle, i ne same da ti prešle bu – nek buš iste tak prešel i ti sam, kak god da te češ ili te štel nebi. Tomu si ni ti kak ni nihči med nami pomoči nemre, jer jemput gda doba življenjska dojde zbeči nihči je nemre. Kak god da pak i povedaš, pomalu ili male bržejše, e te bile jemput ili ni jemput, e ti se vse te skup dopale ili ti se te zamerile za praf - vse te skup kak god da si drugač te morti i štel, vse te skup bi dopovedati prie ili kesnejše triebale ti tak da vse te skup nemre ti ni ziti po pravice.

Z naopačnoga se nigdar nie a iste tak se ni nigdar  mogle nabu nič poštenoga spelati, kak god da nekteri su šteli i čeju. Jedine kaj vsemi nam se kaže kak sveklinica je te da moreme z senjami prejti tam gde nihči nam nič nemre, tam gde vse nam je moči. Unda gda senjame moreme sami sebe videti kak sme unakvi kakvi si te bi šteli biti, kak vse moreme i kak vse od ruke nam ide. A kak vse te praf za praf ide i kak se vse te skup prie ili kesnejše odvrti, unda zbeči nemreš ni te kak poljek sebe ti več nikoga ni nie. Unda moreš pobeči ili se zdignuti moreš, tak da vsemi kazati ideš da strah te nie. I kak god da vse ti te skup zgledi tak kak da senjati se ni ne splati, jer po glave ti same miže te da ak se niesi za senje unda teške da se buš mogel pririhtati za nekaj druge. Življenje niesu ni  same senje, te je une kaj razmeti nie same tak moči.

 A ide vrieme, ide i nikak zastanoviti se neda. Kak god da su ti na prvomu mestu penezeki, ljetričice i kroveki kaj ih tulike maš da več zanje ni neznaš, vse jedne z vsem tem skup kupiti nemreš pajdaše i pajdaštve. A ak po pravice i po istine se spominali bume, unda je iste nam tak pred vsemi povedati trieba – da pajdaši i pajdaštve niesu ti ni nigdar na prvomu mestu bili. Navek su ti se tak penezeki kak najmilejši del življenjiča pred očmi kazali, navek si penezeke poljek sebe najrajši štel i meti, nič ti nie lepše i drajše od njeh nigdar na svietu ni bile. Kak god da su furt ti pred očmi lazili penezeki su praf za praf same drekec mrčnjački, drekec najvekši i najsmrdlivejši, drekec kaj duhu ma od tere vsaki pošteni človečec beži. 

A nie zaistinu vse h življenju une za kaj ti držiš da naopačne je ili pravične, nie ti tak vsejene e poštenje maš ili do njega nič ne držiš. Pak po druge strani iste tak povedati morame i te da vse te zgledi ti unak kak sam si si te oddelal – jer ak sam češ naopak iti, ak ne posluhneš poljek sebe nikoga, ak se zastanoviti nečeš, ak se prejdeš vsaki put obračati unam kam nie ti iti trieba – unda niti ti nikoga za strani kriviti nemreš, kak i nihči med nami, kaj krive si prešel i kaj skrenul si. Na nikoga tak ti ni nie smeti z prstem ni kazati, e te bil nehči kaj tvoj je ili je te nekteri kaj za stranjskoga ga drži se. I vse ti te skup zaistinu nemre na pravu stran ni dojti, jer tie putec kaj krive je nasajeni navek krivi je i bu. Iste tak ni   drugački nemre a niti nezna biti, jer unda gda več se pri domačami nemre unda se ide k luckami, a tak ni življenje nema nič vrednoga za kaj se več prijele i bi. Ak nehči vse une kaj dragi su mu odhiti, e radi penez, e radi stolčeka, e radi ljetričice, unda teške da igdar več vrnuti se mogel i bu. Une kaj jedine bu ostale – je te da po pravice se obrneš, dok te još ti je moči, i te je une kaj jedine te od zločice zvlječi more. Ak sam sebe dopoveš te da tak več nigdar neš delal – da zmenil buš se i da bolši buš, te ti je une kaj te jedine more od zločice i od htapljanja zvlječi. Trieba si priznati več jemput da nikak drugač nemre i nejde – nek same klečečki i da same z molitvu na pravu stran se dojti more. Same unda dok ti glava furt ti h nadol gledi ti hvis iti moreš – nikak drugač. A te nie ljehke i te zaistinu šteti i trieba, drugač te ni nejde.

I unda, od vseh kaj dragi su ti je, gdo ti se bu pri ruke furt jedine i našel, unda gda sam buš ostal? A drugač ni ziti vse te skup ni nemre, jer krive si nasajen bil, krivične si se vladal i krivi si putec zebral. Une kaj nie praf nasajene nemre niti dugi cajt zdržati, i kaj unda ostaje ti kak putec jedini – ostaje jedine ti pokora. Une kaj morti ti je i moči, je te da poveš, kaj najžmekšejše ti je – da žal ti je, da od zločice si se otrgnul, da dobroga si se prijel i da buš ga se držal od denes dok god zase buš znal.

Prim.dr.sc. Rajko Fureš, dr.med.